انا اتسرقت - سيناريو بديل للواقع

ابراهيم الحفناوي السبت 16 july 2016 11:53:19 مساءً

مشاركة |

انا اتسرقت - الحمد لله - (الحلقه التانيه)

سيناريو بديل للواقع

ملخص ما سبق - - - -

الليله الاخيره من الشهر الكريم - الواحده والنصف فجرا - الطريق على بداية المحور

فجاه - احدهم خطف الموبايل من كف ايدى الشمال - وجرى

وكان ينتظره على الطريق المعاكس - آخر - بموتوسيكل - وذهبا

بهدووووؤ شديد قفلت السنتر لوك - والازاز المفتوح -

للحفاظ على السياره - وكمان للحفاظ على سلامتى الشخصيه

ومازل شابين - بموتسيكلان - يمينا ويسارا - يحاولان استثارتى للجرى وراء الخاطفين

تقدمت فى طريقى دون ان اعبا بهما - وعدت ادراجى سالما - ويغور الموبايل

( بداية السيناريو البديل )

* * فلاش بااك ( 1 ) - سيناريو متوقع - فى حالة نزولى - خلف - السارق

صوت كلاكسات صاخبه - وضوضاء الشارع -

وببحث فى موبايلى على رقم - نشات شاهين - علشان اكلمه - وفجاه اتخطف الموبايل

- فتحت الباب - وصرخت بقوه - حرامى - حرامى - وبجرى بقوه -

ومازلت اجرى وراءه - لمسافة مائة متر - حتى شعرت بالم شديد بصدرى من جهد الجرى - فتوقفت - اخد نفسى وعينى متعلقه بالموتوسيكل - ومازال ضوؤ موبايلى يطل بشعاع وداع اخير من يد السارق -

ياتى خلفى مجموعه من المصريين الجدعان -

- ايه سرق منك حاجه ؟؟

* لا - ده مارثون اخر ليلة رمضان ما تقلقش مفيش حاجه - أأه طبعا سرق الموبايل

- يا استاذ - الله يعوض عليك - المهم انك كويس

- يا استاذ هو الموبايل نوعه ايه ؟

* مش نوعه - المهم البيانات والداتا اللى عليه

رجعت متعب وفجاه العربيه ؟؟

- العربيه مش موجوده - يا نهار اسوود - انا جريت وسبت المفاتيح فى الكونتكت

الراجل بتاع المناديل - قالى - يا عم حرام عليك - قعدت أقولك خد خد خد سيبك منه وانت ولا سامعنى - اهو الحركه دى بتتعمل كل يوم والغرض مش الموبايل - الفرض سرقة العربيه

اشعر بدوار رهيب - مش قادر اتكلم - حاسس بنار فى قلبى - حاسس بقهر - حاسس بظلم - حاسس ان انا عبيط اوى كده - حاسس بحالة عجز رهيبه - حاسس ان انا اضحك عليا جدا

قعدت على الرصيف - بحاول اتلم على اعصابى وتفكيرى - بحاول امسك ايدى الشمال باليمين - واليمين بالشمال علشان محدش يحس انى ايدى بتترعش من الخضه والمفاجاه

- يقطعنى صوت واحد - الله يخرب بيوتهم هما مش عاتقين فى رمضان كمان

اخدت بعضى فى تاكس - وطلعت على قسم الشرطه -

الامين قالى - خير يا استاذ - قلت له عاوز اعمل محضر سرقة عربيه

- معاك الرخص ؟؟؟ قلت له للاسف فى العربيه

- طب وانا اعرف منين انك صاحب العربيه ؟؟؟؟

قلت له - مش معقول اكون جالى اصور الكاميرا الخفيه الساعه اتنين وربع الفجر

قالى - طب روح استاذن من البيه الماموووور !!!

انا طبعا مستسلما - وشبه ياس جدا - ضاعت فلوسك يا هيما - الموبايل والعربيه

ومش عارف هقول ايه للعيال - وعمال افكر - هتحرك ازاى من غير عربيه ؟؟

- دخلت على الباشا المامور - الراجل بكل تفهم قالى مفيش مانع طبعا تعمل محضر

- لا يا مش معقووووول - هو كمان ممكن يكون فيه مانع ؟؟

- قالى - ابدا يا استاذ - بس حضرتك لازم تطلع على البيه رئيس المباحث علشان ده اختصاصه

- عقلى يا ناس - همووووت من وجع السرقه - وكمان رحلة العذاب فى القسم علشان ابلغ عن السرقه - يا نهار اسوووووود

- طلعت مكتب البيه - رئيس المباحث - قالولى مش موجوووود طلع معاينة جريمة قتل

- طب اى حد من الساده المعاونين -

- لا والله بقولك جريمة قتل - كل الساده المعاونين - فى المعاينه - امال اسمهم معاونين ليه

- نزلت بضحك زى المجنووووون - طب اروووح فين - ابلغ عن سرقة عربيتى فين

ياريتنى ما كنت عملت فيها جاكى شان - وطلعت اجرى ورا الحرامى ابن الكلب

كان زمانى محافظ على عربيتى وكرامتى

- نزلت تانى للاخ - امين الشرطه - وقلت له - كده باردوا يا زميلى - اشحال لو مكنتش انا ابن كارك - محامى - زميلك يعنى - تعمل معايه كده -

* قالى - والله تعليمات - تعليمات - اعمل ايه بس ؟؟؟؟

- حطيت ايدى فى جيبى - طلعت - خمسين جنيه

( استغفر الله العظيم يارب - رشوه فى اخر ليله فى رمضان ) بس هعمل ايه ؟ عاوز الحق اعمل محضر - يمكن يلحقوا يبلغوا المرور على الطرق

- لقيتنى بضحك اووووى - وبقول لنفسى - طرق مين يا عم الحاج - ده زمان الحرامى وصل على حدود السلوووم - ولا تل ابيب

- كرمشت الخمسين جنيه - وادينها للباشا - امين الشرطه - غمض عنيه وكانه زعلان أوووى وقالى ليه كده بس - مش النظريه يا عمنا - اقولك - هات بطاقتك خلينا نلحق نعمل لك المحضر - اهو نكسب فيك ثواب قبل رمضان ما يخلص

- عملت المحضر - وخرجت من باب القسم - وفى لحظة نسيان - وزى ما انا متعود كل ما اخرج من القسم او النيابه او اى مكان احوط ايدى فى جيبى - اطلع مفاتيح العربيه - اصلى بعشق صوتها وهى بتقول - تك تك - وكمان نورها الفسفورى وهى بتدلع كانها فرحانه انى رجعت لها ومروحين

- يا - انا نسيت - العربيه اتسرقت - والله عينى دمعت - ماهى العربيه عشره باردوا وبحبها والله زى ولادى - مش كنت بنضفها بايدى وادلعها - وكانت مستحملانى وشيلانى وبقضى بيها مصالحى - يارب - يارب - يارب - وحياة حبيبك النبى ترجع لى العربيه -

- طب هروح اقول ايه للعيال - وهعمل ايه ؟ وهتصرف ازاى - مش هقدر اشترى عربيه تانى - ما انتم شايفين الدولار بقى بكام - والمستعمل مولع فى سعره والجديد خلاص عدى سعره الفلنكات

ياريتنى ما كنت جريت ورا الواد الحرامى - ياريتنى ما كنت فاتح الشباك وانا بتكلم فى التليفون - يا ريتنى ما كنت اتكلمت فى التليفون من اساسه

فلاش باك - ( 2 )

- بينما - وانا سرحان فى كل الاحداث دى - لقيت بنتى بتقولى يالا يا بابا الحق خد لك بوق ميه قبل الفجر ما يدن - جريت على البلكونه - كانت عربيتى حبيبتى واقفه تحت العماره منوره الشارع ومنوره حياتى كلها - يا - انا كنت سرحان كل ده

طب - الحمد لله يارب - انى مجريتش ورا الواد الحرامى ابن الكلب - اللى سرق الموبايل - الحمد لله يارب - انك الهمتنى الصبر والهدووء وخلتنى مطلعتش اجرى ورا الحرامى المجرم - وفى داهيه الموبايل -

- طب والله بقالى يومين من غير موبايل - ولا صداع ولا خوتة دماغ - بلا واتس بلا زفت بلا كل شوية ابص على الماسنجر - والفيس و و و و و و

ياا - احمدك يارب

ملحوظه - السيناريو الخيالى - ده - مش الغرض منه مص الشفايف واصعب عليك ولا حد يستجدع ويجيب لى موبايل هديه بدل اللى اتسرق

- الغرض اننا ناخد بالنا ونتعلم من خبرات بعض -

وربنا يسترها على الجميع - وحسبى الله ونعم الوكيل فى الحرامى اللى سرق الموبايل

* * * عيد سعيد * * *

انتظرونى فى الحلقه الثالثه - الاكثر خطوره

ابراهيم الحفناوى - المحامى